DEL A. – Normalreglar for alle vg. skolar Møre og Romsdal.

FORMÅL.

§ 1: Alle elevar har rett til eit godt fysisk og psykososialt miljø der det er nulltoleranse for rus, mobbing, vald og anna krenkande åtferd. Formålet med reglementet er å skape godt samarbeid, god trivsel, respekt og medansvar. Reglementet skal fremme god orden og gode arbeidsvanar og slik sett legge til rette for god læring i eit godt arbeidsmiljø.

Reglementet forpliktar heile skolesamfunnet og skal omfatte:

• Elevane sine rettar og plikter
• Orden og åtferd
• Tiltak overfor elevar som bryt reglementet, og framgangsmåten ved handsaming av slike saker.

VIRKEOMRÅDE.

§ 2: Reglementet gjeld for alle elevar ved skolen under opplæring og, så langt ikkje anna er bestemt, også for vaksenopplæringa sine elevar, lærlingskoleelevar, hospitantar og andre, når opplæringa går føre seg i skolen sin regi. - Reglementet gjeld også ved opplæringsformer og aktivitetar som vert gitt under skolen sitt ansvar og regi utanfor skolen sitt område, så langt dette ikkje er i strid med lokalgitte påbod eller forbod.– Reglementet gjeld og ved ekskursjonar, og er retningsgivande for vurdering av karakter i orden og åtferd.

RETTAR.

§ 3: Elevane har rett til vidaregåande opplæring, jf. Opplæringslova med forskrifter, fylkeskommunale vedtak og gjeldande læreplanar.

§ 4: Elevane har rett til ei opplæring som er tilpassa føresetnader, evner og behov. Eleven har derfor rett til, og skal delta i:

• Planlegging av opplæringa:
  • Utforming av periodeplanar
  • Tolking og analyse av læreplanmål
  • Utforming av læringsmål
  • Val og utforming av kriterie for vurdering
  • Val av lærestoff i forhold til læreplanane, ma. rett til sjølv å velje læreverk
  • Val av arbeids- og vurderingsformer

• Gjennomføring av opplæringa

• Vurdering av opplæringa
  • Sluttresultatet av arbeidet i forhold til læringsmål
  • Prosessen som førte fram til resultatet

Desse momenta kan vere individuelle for den enkelte elev, felles for ei mindre gruppe eller for større grupper.

Skolen er ansvarleg for å gi elevane dei nødvendige føresetnadane for å kunne delta aktivt i dette arbeidet.

§ 5: Elevane har rett til å få tilbakemelding, oppfølging og rettleiing i forhold til dei mål den enkelte arbeider etter.

§ 6: Det skal gjennomførast førebudde elevsamtalar minst ein gang kvar termin mellom elev og kontaktlærar eller annan lærar.

§ 7: Ved faglege, personlege eller sosiale vanskar som har innverknad på opplæringa, har elevane rett til rådgjeving, oppfølging og hjelp til å finne seg til rette, m.a. tilgang til sosial- og spesialpedagogisk teneste.

§ 8: Elevane har rett til rådgjeving om utdanning og yrkesval.

§ 9: Skolen skal ha eit system som sikrar at det blir vurdert i kva grad organiseringa, tilrettelegginga og gjennomføring av opplæringa er med på å nå dei måla som er fastsett for eleven eller gruppa. – Grunnlaget for vurderinga er læreplanverket sin generelle del og fagspesifikke delar som heile skolesamfunnet er forplikta overfor. – Eleven har rett til og skal delta i denne vurderinga.

§ 10: Elevane har rett til, og bør ta opp med skolen (faglærar, kontaktlærar, rådgjevar, skoleleiinga, evt. gjennom elevtillitsvalde) forhold som ikkje fungerar tilfredsstillande.

§ 11: Elevane har rett og plikt til å danne elevråd og å vere representert i skoleutval, skolemiljøutval og arbeidsmiljøutval. – Elevrådsrepresentantar har rett til regelmessige møte med skoleleiinga.

PLIKTER.

§ 12: Elevane har plikt til å rette seg etter lover, reglement og instruks som gjeld til ei kvar tid.

§ 13: Elevane plikter å delta aktivt i opplæringa i den form som blir avtalt.

§ 14: Eleven skal snarast råd ta kontakt med faglærar dersom han/ho ikkje kan følgje opp arbeid til avtalt tid.

§ 15: Elevane skal følgje verne- og tryggleiksreglar og bruke det arbeidstøy og verneutstyr som krevjast i læreplan, eller som er påbode av arbeidstilsyn, departement eller skole.

§ 16: Elevane skal halde seg med nødvendig lærestoff, materiell og utstyr til eige bruk som skolen ikkje held. Pålagt materiell og utstyr eller betaling for dette må ikkje vere i strid med forskrift eller vedtak frå departement eller fylke.

§ 17: Skolen sin eigedom og utstyr skal brukast med omtanke. Hærverk og skade kan føre til erstatningsansvar, jf. skadeerstatningslova.

§ 18: Elevar som gjennom sitt arbeid, oppdrag eller verv i samband med vidaregåande opplæring blir kjend med spesielle opplysningar, har teieplikt etter forvaltningslova sine reglar § 13 – 13f. Teieplikta gjeld også etter at eleven har avslutta vidaregåande opplæring.

DEL B. – Særskilte reglar for Ulstein vidaregåande skule.

ARBEIDS- OG LÆRINGSMILJØ

§ 19: Ein god skole for alle inneber ma. at elevar og tilsette må vise omsorg og respekt for kvarandre i skulekvardagen. For å oppnå dette, må partane:

• Syte for arbeidsro i undervisningstimane
• Vise respekt for opplæringa
• Møte presis til timar og avtalar
• Ta eit felles ansvar for å halde skolen sitt område reint og ryddig, både ute og inne
• Ta godt vare på skulen sitt utstyr, bygningar og undervisningsmateriell
• Unngå uønska framferd og handlingar som td. hærverk, trugsmål mot medelevar eller andre tilsette på skulen, fysisk vald, mobbing av medelevar eler andre tilsette, rasistiske utsegn og handlingar, seksuell trakassering eller sjikane på grunn av religion eller livssyn.

BRUK AV MOBILTELEFON/ELEKTRONISK UTSTYR

§ 20: Mobiltelefon og event. anna personleg elektronisk utstyr (td. MP3-spelar) skal vere avslått i undervisningstimane. Faglærar kan drage inn utstyr som ikkje vert avslått i undervisningstida. Dette skal leverast til ass. rektor, og eleven kan få det utlevert ved skuleslutt same dag. Misbruk av slikt utstyr i undervisningstida vil føre til merknad.

• På prøver skal mobiltelefonar og anna personleg elektronisk utstyr samlast inn av faglærar og plasserast framme i klasseromet til prøva er over, for å hindre fusk/forsøk på fusk.
• På skulen sine fellessamlingar skal alle mobiltelefonar/personleg elektronisk utstyr vere avslått.
• Til eksamen gjeld eigne retningsliner.

RØYKING OG BRUK AV SNUS ER FORBODE.

§ 21: Gjennom den nye røykelova har samfunnet klart gitt til kjenne at bruk av tobakk er eit stort helseproblem. Røykelova set totalforbod mot røyking i offentleg bygningsmasse eller der røyking kan representere ein helserisiko for andre. Røyking er difor forbode på skulen og på skulen sitt område. Skuleområdet strekk seg frå busshaldeplassen i aust til og med parkeringsplassen mot vest. I samband med kroppsøving/idrettsaktivitetar er også banene på Høddvoll å rekne som skulen sitt område. Det er også forbode å røyke i utmarksområdet nær skulen. – På gitte vilkår, og gjennom skriftleg søknad til rektor, kan rektor gi dispensasjon frå røykereglementet. Elevar som er under 18 år må ha underskrift på søknaden frå foreldre/føresette.

Bruk av snus på skulen sine område representerer eit helse- og miljøproblem både for den einskilde elev og for skulen og er såleis forbode. Det er ein klar samanhang mellom eit godt arbeidsmiljø og eit godt læringsmiljø. Alle partar vert difor bedne om å bidra til å halde skulen rein og fin!

• For elevar som får dispensasjon frå røykereglementet, har skulen lagt til rette for ein ”røykefristad” i eit hjørne på den øvre parkeringsplassen aust for skulen.
• Elevar som får innvilga dispensasjon frå skulen sitt røykereglement, vil verte innkalla til skulen si helsesøster, og vil få eit tilbod om hjelp til å slutte å røyke dersom dei sjølv ynskjer det.
• Brot på denne delen av reglementet kan få konsekvensar for ordenskarakteren

BRUK AV RUSMIDDEL ER STRENGT FORBODE.

§ 22: Oppbevaring, omsetting eller bruk av rusmiddel (alkohol eller andre rusmiddel) er strengt forbode ved skulen. Forbodet gjeld også ved tilskipingar som skulen har ansvar for, både innafor normal skuletid og elles ved fellesarrangement.

Rusmedel representerer normalt eit trugsmål mot skolen sitt arbeids- og læringsmiljø og mot skolen sine fellesarrangement. Brot på dette reglementet vert difor sett på som svært alvorleg, og vil få umiddelbare konsekvensar for den einskilde.

SKULEN SINE HMT – RUTINAR.

§ 23: Alle elevar og tilsette ved skulen har krav på ein trygg og sikker arbeidsplass. Skulen er pliktig til å ha HMT- rutinar som sikrar kvardagen på skulen både for elevar og for dei tilsette. Rutinane skal ivaretakast av Arbeidsmiljøutvalet og Skolemiljøutvalet, gjennom skulen si Verneombodsteneste, skolen sin internkontroll, og den årlege Vernerunden. Representantar for elevane og for dei tilsette skal ha plass i desse formelle organa, elevane i saker som vedkjem dei.

PARKERING.

§ 24: For å sikre ein trygg kvardag for elevane ved skulen og ivareta orden også utanfor skulebygningane, må elevane parkere både bilar, motorsyklar og syklar på tilvist plass. Avvik representerer ofte ein sikkerheitsmessig risiko for andre elevar eller tilsette.

BRUK AV SPESIALROM – INTERNETT.

§ 25: Spesialrom på skulen med mykje utstyr kan ofte representere ei fare for elevane si helse, eller dei kan vere særskilt utsette for hærverk. Elevane må halde seg til gjeldande reglar for korleis desse roma skal nyttast.

• Skulen sitt IT-utstyr skal berre nyttast til opplæringsføremål. Misbruk av internett til nedlasting av materiale som ikkje høyrer heime på ein skule, vert sett på som brot på skulen sitt reglement og vil få konsekvensar for den eleven som bryt reglementet. Skulen vil gjennom IT - ansvarleg følgje med i den it - trafikken som til ei kvar tid går føre seg på elevnettet.
• Internett representerer ein formidabel informasjonsbase for heile skulen. Det er skulen si oppgåve, prinsipielt i alle fag, men spesielt i norskfaget, å lære opp elevane i kritisk bruk av internett. Det er soleis viktig at elevane vert opplærde til å gi kildetilvising når informasjon frå internett vert nytta i ein skulemessig samanhang, td. ved prøve, heimearbeid, prosjektarbeid el. liknande.

FRAMMØTE – FRÅVÆR.

§ 26: Elevane har plikt til å møte presis til opplæringa i den form ho vert gitt. Dersom ein elev kjem for seint til ein undervisningstime, medfører det normalt ein merknad. Dersom eleven kjem meir enn 20 min for seint til timen, vert det registrert som fråvær frå ein heil undervisningstime. Elevar som kjem for seint skal ha dette bokført anten som fråvær av ein heil time eller som ein merknad om forseintkoming.

• Alt fråvær skal vere gyldig og skal registrerast fortløpande av faglærarane. Kontaktlærar har hovudansvaret for å følgje med i fråværsutviklinga for ”sine” elevar, og for å gripe inn når han/ho vurderer det som naudsynt. Ved unormalt stort fråver, kan kontaktlærar be om at eleven dokumenterer skriftleg grunnlaget for sitt store fråver. For elevar under 18 år, skal dette gjerast gjennom foreldre/føresette.
• Skolen vil praktisere ei ordning lik den ordninga som no praktiserast mellom partane i arbeidslivet (jf. IA-avtalen), der partane gjensidig har forplikta seg til, gjennom dialog og felles ansvar, å få det generelle fråveret ned. Kontaktlærar har hovudansvaret for gjennom dialog og god kontakt med einskildeleven, å bidra til ei positiv utvikling av fråveret for ”sine” elevar spesielt (jf. elevsamtalen og kontaktlærarinstruksen), og for fråveret ved skolen meir generelt.
• Elevane har sjølv eit ansvar for å følgje med i si fråværsutvikling, og for løpande å gjere greie for fråveret sitt overfor sin kontaktlærar.
• Fråvær kan i seg sjølv bety at skulen ikkje har naudsynt grunnlag (jf. måloppnåing) til å sette terminkarakter/standpunktkarakter i fag. Dette vert avgjort i eige termin-/standpunktmøte med rektor som leiar, og skulen har plikt på seg til å vurdere avbøtande tiltak før avgjerd vert tatt om at ein elev ikkje får standpunktkarakter. Eleven skal, saman med sine faglærarar, event. kontaktlærar, vurdere slike tiltak i god tid før endeleg termin- / standpunktmøte.
• Den einskilde elev har krav på individuell vurdering i høve stort fråvær. Som ei generell retningsline for praksis ved Ulstein vg. skule, vil skolen reagere med ei munnleg melding til eleven om unormalt stort fråvær ved 8% fråvær, og ei skriftleg melding ved 12% fråvær. Ved meir enn 15% fråvær (20% i 2 timars fag), vil skulen normalt vurdere kor vidt det er grunnlag for å sette termin- / standpunktkarakter i faget (jf. måloppnåing). Dette bør gjerast som eit minimum i eit eige møte leia av kontaktlærar, der alle eleven sine faglærarar er tilstades. For elevar under 18 år skal resultatet av eit slikt møte sendast som skriftleg melding til eleven, med kopi til foreldre/føresette.
• Standpunktkarakter skal normalt settast med grunnlag i 2 ”terminar”, men karakteren skal gi uttrykk for den kompetanse eleven har oppnådd på det tidspunkt da karakteren blir fastsett (jf. nye læreplanar/ny sentral karakterforskrift – måloppnåing - sluttvurdering).
• Elevar som er kronisk sjuke eller har langvarig sjukefråvær frå skulen, har krav på ekstra oppfølging. Slik oppfølging må avklarast med rektor og krev særskilt legeattest. Legeattest bør ligge føre innan 1. oktober, eller snarast råd etter lengre sjukefråvær.
• Med unntak for sjukdom, skal eleven ikkje vere borte frå skulen utan løyve på førehand. Slikt fråvær vil føre til merknad. Søknad om permisjon frå skulen skal stilast til kontaktlærar for inntil 3 dagar. Søknad om permisjon for meir enn 3 dagar skal stilast til rektor. Frist for slike søknader vert sett til minimum ei veke før permisjonstida.
• Ved unormalt stort fråvær skal eleven gi skulen v/kontaktlærar melding om fråværet. Kontaktlærar har også eit sjølvstendig ansvar for å kontakte heimen i samband med unormalt stort fråvær (sjå elles skolen sin Kontaktlærarinstruks).
• Skulen skal gjere elevane merksam på at alt fråvær skal førast på vitnemål / kompetansebevis, både i dagar og enkelttimar. For delkurselevar vert fråværet registrert berre i timar.
• Avgrensa til 14 dagar i skuleåret, kan det gjerast fråtrekk i fråveret etter visse reglar (sjå nedanfor). Slikt fråvær må dokumenterast særskilt. Fråver som ikkje er skikkeleg dokumentert, vert ikkje vurdert. Kontaktlærar har normalt fullmakt til å vurdere fråver som kan gi grunnlag for fråtrekk. Slikt grunnlag er td.:

• • Arbeid som tillitsvald
  • Politisk arbeid
  • Dokumenterte lovpålagde oppmøte
  • Hjelpearbeid
  • Fråver av helse- og velferdsgrunnar
  • Inntil 2 dagar fri for elevar som er medlemmar av andre trussamfunn enn Den norske kyrkja

• Organisert eller sjølvstendig læringsarbeid og skuleadministrative gjeremål skal ikkje reknast som fråvær når det er avtalt med rektor, kontaktlærar eller lærarar i faget. Slikt arbeid må avklarast med skulen på førehand.
• Når elevar får løyve til å ta fri, bør skolen legge til rette for at dei kan gjere ein innsats for å kompensere for dette. Dette er den einskilde faglærar sitt ansvar.

FUSK – KONSEKVENSAR.

§ 27: Opplæring i skulen baserer seg i stor grad på tillit mellom elevane og dei tilsette. Tillitsbrot er såleis eit alvorleg anslag mot skulen sitt grunnlag. Fusk, anten det er fusk på prøver, heimearbeid eller andre deler av skulen si verksemd der det er mogeleg å fuske, er også eit forsøk frå eleven si side på å skaffe seg fordelar i høve til dei andre elevane. Fusk eller forsøk på fusk vert difor sett på som eit alvorleg brot på skulen sitt reglement, og vil få umiddelbare konsekvensar for einskildeleven. Som eit minimum vil terminkarakteren i orden verte sett ned.

• Fusk ved eksamen er regulert i eige forskrift til Opplæringsloven § 4-57. Ein gang i året som eit minimum, og i forkant av eksamen, har skulen plikt på seg til å orientere elevane om fusk og konsekvensar for den som fuskar til eksamen.

VURDERINGSGRUNNLAG - ORDEN OG ÅTFERD.

§ 28: Grunnlaget for vurdering i orden og åtferd er regulert i forskrift til Opplæringslova § 4-9 (ny Forskrift til Opplæringslova vedtatt 23.06.06). Det skal gjevast to separate karakterar, ein i orden og ein i åtferd, og det skal nyttast ein tredelt skala, der karakteren god (G) skal representere den normale situasjonen – vanleg god orden og vanleg god åtferd. Alternativa er nokså god (Ng) – klare avvik frå vanleg orden og frå vanleg åtferd, og lite god (Lg) – i ekstraordinære tilfelle ved store avvik frå vanleg orden og frå vanleg åtferd.

• Karakteren i orden skal gi uttrykk for om eleven viser vanleg god arbeidsinnsats, og korleis eleven følgjer ordensreglane som er fastsette for kvar skole. Ugyldig fråver kan føre til nedsett ordenskarakter.
• Ved fastsetting av karakter i åtferd, skal ein ta ein omsyn til korleis eleven ter seg på skuleområdet og elles når skulen har ansvaret for tilsynet med elevane. Ein skal særleg legge vekt på korleis eleven ter seg mot andre elevar, lærarar og andre tilsette. Ein kan også ta omsyn til korleis elevane ter seg mot kvarandre på skolevegen, og til korleis eleven følgjer ordensreglane som er fastsette ved kvar skule.
• Skulen si vurdering i orden og i åtferd skal haldast skild frå vurderinga av dei reint faglege prestasjonane.
• Skulen skal ta omsyn til eleven sine føresetnader, og til vanleg ikkje legge avgjerande vekt på enkelthendingar.
• Hovudgrunnlaget for fastsetjing av standpunktkarakterar i orden og i åtferd skal vere orden og åtferd hos eleven det siste halve skoleåret.
• Rektor har ansvar for at termin-/standpunktkarakter i orden og i åtferd vert sett i eige møte der alle lærarane til eleven er tilstades.
• Kriteria for karakterane i orden og åtferd skal gjerast kjent for elevane.
• Dersom det er fare for at ein elev får nedsett karakter i orden og/eller i åtferd, skal det gjevast skriftleg melding om det til eleven straks dette er blitt klargjort (”utan ugrunna opphald”), slik at eleven har høve til å påverke dei endelege karakterane.
• Nedsetting av karakter i orden og i åtferd skal dokumenterast skriftleg.
• I høve fastsetting av karakter i orden, vil skulen vil normalt skilje mellom meir vanlege og alvorlege merknadar.
  • Døme på vanleg merknad kan vere: å kome for seint til undervisninga utan gyldig grunn, gløymt naudsynt skulemateriell til undervisninga, bråk/uro i timen osb.
  • Døme på alvorleg merknad kan vere: Fusk eller freistnad på fusk på prøve, innlevering av materiale frå internett til vurdering utan å ha oppgitt kjelde, fråvær utan gyldig grunn, røyking og bruk av snus i skuletida og på skulen sitt område, misbruk av rusmedel i skulesamanhang, manglande innlevering av større skriftlege arbeid som skal evaluerast osb.
  • Alle merknader skal registrerast og dokumenterast på best mogeleg måte. Elevane skal utan opphald gjerast kjent med merknadane sine.
  • Ved meir enn 7 vanlege merknadar, skal skulen normalt reagere med nedsett karakter i orden. Ved meir alvorlege merknadar skal dette raskare få konsekvensar for nedsetting av karakter i orden, etter ei individuell vurdering. Uansett skal det gjennomførast ei individuell vurdering før karakteren vert sett ned.
  • Når det gjeld karakteren i åtferd, vert det vist til § 4.9 – Karakterar i orden og åtferd, i Forskrift til Opplæringslova. Karakteren i åtferd er så vidt spesiell at eventuelle avvik frå det normale – God (G) – må takast opp i kvart einskild tilfelle og vurderast opp i mot formuleringane i forskrifta.

BROT PÅ SKULEN SITT REGLEMENT – KONSEKVENSAR – SAKSHANDSAMING.

§ 29: Skulen er eit lite samfunn som må organiserast relativt detaljert for å kunne fungere optimalt. Dette inneber ma. at også skulen må ha sine reglar som må vere godt kjende for partane, og at brot på desse reglane må ha mest mogeleg klare og forutsigbare konsekvensar for elevane. Konsekvensar av brot på reglane må uansett ligge innafor ramme av Opplæringsloven m/ forskrift.

• Det er berre den eleven/dei elevane som har gjort seg skuldig i brot på skulen sine reglar som kan straffast. Kollektiv avstraffing er ikkje tillate, og konsekvensar av brot på regelverket må stå i rimeleg forhold til regelbrotet. Slike saker bør følgjast opp av skulen så snart som råd.
• Fysisk refsing er ikkje tillate, og heller ikkje krenkande handling. Dette betyr at elevar ikkje kan straffast på ein for dei nedverdigande måte.
• Grunnlaget for skulen sin reaksjon på alle brot på reglementet skal dokumenterast, og eleven skal ha høve til å forklare seg før eventuelle straffetiltak vert set i verk.

I samband med brot på skulen sitt Ordensreglement, vil skulen nytte seg av følgjande tiltak:

1: Refsingstiltak.

2: Særskilde tiltak.

Refsingstiltak:

• Eleven får tilsnakk av faglærar for uro i undervisningstimen. Munnleg/skriftleg åtvaring frå faglærar, med kopi til kontaktlærar.
• Eleven vert utestengd frå undervisninga ved skulen resten av timen. Faglærar har fullmakt til å sette i verk dette refsingstiltaket. Rektor skal ha melding om dette så snart som råd, og det skal settast i verk tiltak for at slikt ikkje skal gjenta seg (kontaktlærar/rådgjevar).
• Etter nøye vurdering både av kontaktlærar, faglærarar og skolen sitt øvrige hjelpeapparat, kan det gjennomførast mellombels eller permanent byte av undervisningsgruppe (faglærar/avdelingsleiar/rektor).
• Skriftlege avtalar mellom eleven og skulen (faglærar, kontaktlærar, rektor)
• Kontakt med heimen og involvering av føresette (faglærar/kontaktlærar).
• Eleven vert utestengd frå undervisninga resten av dagen. Rektor har fullmakt til å sette i verk dette refsingstiltaket.
• Nedsett karakter i orden og åtferd, termin- og/eller standpunktkarakter avhengig av graden av regelbrot. (standpunkt-/terminkaraktermøte).
• Beslag av ulovlege gjenstandar (faglærar/ ass.rektor).
• Pålegg om å utbetre skade som eleven har påført skolen, kostnadsfritt for skolen (erstatning) – (Ass. rektor).
• Dersom eleven ikkje er myndig, skal foreldre-/føresette kontaktast (faglærar/kontaktlærar/).

Særskilte tiltak:

Desse tiltaka kan nyttast dersom tilhøva ikkje betrar seg etter at skulen har tatt i bruk refsingstiltak og eventuelt hjelpetiltak som skulen rår over (kontaktlærar, rådgjevar, PPT, helsesøster og liknande.) Når det elles gjeld sakshandsaminga i slike meir alvorlege saker, vert det vist til reglane i Forvaltningslova.

• Utestenging av eleven frå skulen si undervisning i meir enn 1 dag. Rektor har fullmakt.
• Utestenging av eleven frå resten av kurset. Saka må leggast fram for skuleeigar til avgjerd. Rektor har berre fullmakt til å utestenge ein elev for brot på skulen sitt reglement med inntil 5 skuledagar.
• Melding til påtalemakta av straffbare tilhøve. Rektor har fullmakt.
• Tap av rett til vidaregåande opplæring. Saka må leggast fram for skuleeigar (Fylkestinget) til avgjerd, med tilråding frå rektor.

Når det gjeld konsekvensar av brot på skulen sine reglar, vert det elles vist til ma. Rundskriv frå Utdanningsdirektoratet 07-2005, Opplæringslova §§ 3-7 og 3-8 og forskrifter, Skadeerstatningslova § 1-2. – Dei mest alvorlege refsingstiltaka vil innebere at det blir fatta enkeltvedtak i samsvar med Forvaltningslova sine reglar § 2. Det vert og vist til sakshandsamingsreglane i Forvaltningslova kap. III - IV

§ 30: I tillegg til ordensreglementet har Ulstein vg. skule eigne retningsliner for:

• Ekskursjonar
• Bruk av skulen sine spesialrom
• Kontaktlærarordninga
• Skuleavisa ”Frettepålen”
• Heildagsprøver
• IKT reglement

Ulstein vg. skule – august 2008.

Leiinga.